وحشتينى

منين ما باكون بلاقيكي محاوطاني
و الاقي القلب مطمّن
و احسك ما انتي ساكناني
ف قلبي و روحي يا روحي
و وجداني
بلاقيكي فيونكه ف شعر ليل سارح
بيضحكلي
و اشوفك بكره و امبارح
و اشوفك رسم لملامح
على لوحة سنين مرّت على شكلي
و الاقيكي ف طعم البن ف القهوة
والاقيكي بتقريلي ف فنجاني
والاقيكي مراكب ماشية ف عروقي
و الاقيكي خيوط تغزل تياب شوقي
والاقيكي نسيم فارد دراعينه على عمري
والاقيكي نجوم فرحي
و الاقيكي كمان قمري
و الاقيكي شِفا جرحي
و الاقيكي شعاع فجري
و الاقيكي شراييني
و تاج مرسوم على جبيني
والاقيكي
ف حلّي أو ف ترحالي
ف شِعري أو ف موّالي
حروف بنّور و بتلالي
و تملالي كراريسي
بورد و فل أزين بيه متاريسي
جبال حبك تضاريسي
حنان قلبك فوانيسي
و اشوفك بين تجاعيدي
قمر وناس ف يوم عيدي
منوّر ليه ميييييييييت شمعة
تونسني ف طريق حلمي
توصلني لبر رموش بساتينك
و الاقيكي ف سحر عيون بنات بلدي
و ريحة كحل بيعطر مراود من رياحينك
و طيبة قلب بتطبطب على ولدي
و بحر يصب ف الاحساس تفانينك
و الاقيكي ف صبح و ليل
بلحن جميل مالهش مثيل
تناديني
والاقيكي ف قمح زرعته بإديه
و نبّت خيره من طيني
و الاقيكي
عيدان ياسمين و مزروعة ف كفّيني
و مروية بآهات شوقي لأشوقك
عليل محتاج لترياقك
ما هو انتي مي ّتي و زادي
و خمسة ف وش حسادي
و لحم كتافي من خيرك
و مييييين غيرك
ها يقدر يمتلك قلبي
و لا يخبّط على بابه
و لا يمسك زمام عشقي
و يفتح صفحة ف كتابه
دا أنا كلي بلحمي و دمي و شعوري
و إحساسي
و زي ما قالوا ف الأمثال
أنا من ساسي يا غالية
لحد ما توصلي لراسي
بدووووووووووب فيكي
و ياما كتير قلوب دابوا
ف حسنك ما انتي سنيورة
و أمورة
وكل ما أبص ف الصورة
والاقيكي تناديني
بتنزل دمعة من قلبي
عشان تنطق
وحشتيني

أخويا العزيز
كل ما أقرأ القصيدة أفتكر كلماتها بصوتك فى الندوات التى تطلبها من
ياريت تسمعهالى فى أقرب وقت ولو على المحمول
تثبت القصيدة بواسطى

الأستاذ الشاعر الراقى جابر الزهيرى :
أبداع متميز وأكثر من رائع ويعد وجودك أضافة للمنتدى
لك منى كل الشكر والتقدير كم كانت سعادتى بقرأة القصيدة فهى إبداع راقى لشاعر مبدع يعد قدوة ومثل لأبناء جيلة

رغم اتك كنت معايا
لكن وحشتني كتير
يااستاذ جابرنصرك الله
علي من يعاديك
دمت بخير وسلام