ست الحسن

يا ست الحُسن من حُسنك
عشقت الحُسن
باشوف الليل جدايل نازلة بتهفهف
على خدودك
و من وسطيها نور البدر بيلالي
و يتمايل كأنه الورد
و مزيّن شواشي الغصن
تميلي و قلبي ويّاكي
و روحي يا روحي حارساكي
و بتمنّي يا نن العين
رموش العين تكون دايماً محاوطاكي
و حاضناكي بنسيم القلب
يا ست الحسن
و أشوف الفرحة تسبقني لسهر ليلك
ترقّص ف الخلا خيلك
على رنّة خلاخيلك
تزوّد فيّه أشواقي
و تبعدني عن التفكير
ف لحظة حزن
و أشوفك تاج على راسي
يا ساكنة ف نبض إحساس
يا صورة حب مرسومة
على قلبي و كرّاسي
دا أنا لو عشت لو ثانية
بعيد عنّك
بلاقي القلب بيقاسي
يقولي :ارجع
ما تحرمنيش من الفرحة
دا كل الدنيا ما تساوي
دقايق حلوة عشناها
مغطّينا الدفا ف الحضن
و بارجعلك . . يا ست الحسن

بالرغم انك مش معايا لكن حاسس بوجودك ويايا
كتر خيرها ست الحسن جمعتنا زينة الصبايا