رباعيات صلاح جاهين( الجزء الاخير)

رباعيات صلاح جاهين( الجزء الاخير)
****************************
يا ملَوّنين البيض في شم النسيـــــم

لُون الحنين و الشوق و خمر النديم

ما تعرفوش سايق عليكو النبــــــي

تلوّنوا الأيام بلون النعيــــــــــــــم ؟

عجبي!!


الدنيا صندوق دنيا .. دور بعــــد دور

الدكة هي .. و هي كل الديكـــــــــور

يمشي اللي شاف ويسيب لغيره مكان

كان عربجي أو كان امبراطــــــــور

عجبي !


قطي العزيز راقد على الكنبــــــات

في نوم لذيذ .. و بيلحس الشنبات

و انا كل عين فنجان مدلدق قلــق

صدق اللي قال إن الحياة منابات

عجبي !!


قالوا السياسة مهلكة بشكل عـــــــــــام

و بحورها يا بني خشنة مش ريش نعام

غوص فيها تلقي الغرقانين كلهــــــــــم

شايلين غنايم .. و الخفيف اللي عـــــام

عجبي !!!


سلام سلام سلام سلام ... سلام

كلام كلام كلام كلام ... كلام

هز الورق يا صاحبي كدهــــوه

يطلع كلام سلام .. و سلام كلام

عجبي !!!!


فوق تحت . ورا أُدام . يمين شمـــال

في الجو . تحت الميه . أو في الرمال

طلب الكمال يحرم على الممـــــــــكن

و الممكنات دول محرومين م الكمال

عجبي !!!


الروح الهائمة